今日去左做義工，幫一班慈正邨長者清潔。
而我係第四組，同一位Good組、一位Peace組弟兄一組，
被分派的婆婆家中電話有響，但冇人聽～
一直等等等，決定上門撞下運氣，結果都係冇人。


返回集合點，之後我地就被分派去幫手派毛衣順道探訪，最後成功地探訪左兩位婆婆，送出左一件衫。


第一個婆婆比較靜，一句起兩句止，同佢都有出現deadair時間，我已經狂諗話題，
當講到佢身體情況同埋覆診時比較主動，其他仍然一句起兩句止，
或者婆婆未習慣有人去探訪～


第二個婆婆係當我地打電話俾佢，佢話而家都有義工上去探訪（可能其他機構），
咁我地打算．．算啦．．．唔好又打擾佢．．．
但後來我諗諗下，唔探訪傾計都不如上去送件冷衫俾佢，於是我地上左去，
最後婆婆都邀請左我地入去傾計～
講下佢後生，講下佢鄉下，好快就夠鐘了。


最後夠鐘，就返回集合點了。


每次探完長者，自己都會諗，第日老左都會唔會有人黎探下我，
而我亦都好想趁後生仲有時間去關心長者。
最重要唔係要佢信耶穌，而係感受到我地因著耶穌關心佢。